Naadaan hun jaanti hun,
Thoda jaldi mein rehti hun, yeh bhi jaanti hun.
Galatiyan bohot karti hun,
Lekin jhat se maafi bhi maang leti hun.
Kabhi be-tuki baton par muskurati bhi hun,
To kabhi itni samajhdaar ho jaati hun ki khud ko sab samjha deti hun.
Kabhi logon ke beech rehkar chup rehna pasand aata hai,
To kabhi itna bolne ko jee chahta hai par sunne waala koi nahi hota.
Kabhi akele baith kar purani yaadon mein kho jana acha lagta hai,
To kabhi unhi yaadon to yaad karke aankhein bhar aati hain.
Kabhi akelepann se pyaar hone lagta hai,
To kabhi ek dost ko gale lagane ko mann karta hai.
Kabhi kitaabon ke panno mein chipe zindagi ke haseen lamho ko padh khush ho leti hun,
To kabhi un lamho ka zindagi mein na hona ek khaalipan sa lagta hai.
Kabhi baarish mein dil khol kar naachne ko mann karta hai,
To kabhi sab kuch chhod ke bhaag jaane ko dil karta hai.
Shayad apne mann ki baatein theek se bayaan nahi kar paati,
Par iska matlab yeh nahi ki main kuch nahi jaanti.
Jaanti hun ki waqt hamesha saath nahi deta,
Par dil phir bhi sapne dekhne se nahi rokta.
